தமிழ்நாடு சட்டமன்றத் தேர்தலில் 108 தொகுதிகளை கைப்பற்றி வெற்றி பெற்றதைத் தொடர்ந்து நடிகர் விஜய் தனது மகிழ்ச்சியையும் நன்றியையும் மக்களுடன் பகிர்ந்துள்ளார்.
அவர் வெளியிட்ட உருக்கமான பதிவில், கட்சி தொடங்கிய நாளிலிருந்தே பலர் ஏளனமாகவும் விமர்சனமாகவும் அணுகியதை நினைவுகூர்ந்தார். அரசியலில் இது இயல்பானது எனக் கருதி, யாரையும் சாராமல் மக்களை மட்டுமே நம்பி தேர்தல் களத்தில் தன்னம்பிக்கையுடன் நின்றதாக குறிப்பிட்டார்.
நடுநிலை மற்றும் விமர்சனம் என்ற பெயரில் பல அவதூறுகளும் அவமானங்களும் எதிர்கொண்ட போதிலும், தமிழ்நாட்டு மக்கள் தாயன்போடு தொடர்ந்து ஆதரித்து வந்ததாக அவர் தெரிவித்தார். இந்தத் தேர்தலில் மக்கள் அளித்த பேராதரவு இந்திய அரசியல் வரலாற்றையே அதிர வைத்த அதிசயமாக அமைந்ததாகவும் கூறினார்.
குடும்பங்களை வழிநடத்திய இளம் தலைமுறையின் பங்கு இந்த வெற்றிக்கு முக்கிய காரணமாக இருந்தது எனவும், இது ஒரு அரசியல் வெற்றியை மட்டுமல்லாது உணர்வுப்பூர்வமான ஜனநாயகத்தின் வெற்றியாகும் எனவும் அவர் விளக்கினார்.
மேலும், பணநாயகத்தை ஒதுக்கி மாற்றத்திற்கான புதிய அரசியல் கலாசாரத்தை மக்கள் உருவாக்கியுள்ளதாகக் குறிப்பிட்டார். இந்த வெற்றி தமிழக வெற்றிக் கழகத்தை ஒரு வலுவான மாற்ற சக்தியாக நிலைநிறுத்தியுள்ளதாகவும் தெரிவித்தார்.
இறுதியாக, இந்த மாற்றத்தை உருவாக்கிய தமிழ்நாட்டு மக்களுக்கு தனது வாழ்நாள் நன்றியை அர்ப்பணிப்பதாகவும், கட்சி நிர்வாகிகள், தொண்டர்கள் மற்றும் ஆதரவாளர்களுக்கு மனமார்ந்த நன்றியை தெரிவித்தார். இம்முறை வாக்களிக்காதவர்களும் எதிர்காலத்தில் ஆதரிப்பார்கள் என்ற நம்பிக்கையுடன் அவர்களுக்கும் தனது அன்பை பகிர்ந்தார்.
