தேசிய டெங்கு ஒழிப்பு பிரிவின் தகவலின்படி, நாட்டில் டெங்கு காய்ச்சல் பரவல் தொடர்ந்து அதிகரித்து வருகிறது. கடந்த 24 மணித்தியாலங்களில் மட்டும் 1,217 புதிய டெங்கு நோயாளர்கள் அடையாளம் காணப்பட்டுள்ளதாக அந்தப் பிரிவின் பணிப்பாளர் கபில கன்னங்கர இன்று (01) கொழும்பில் நடைபெற்ற ஊடகவியலாளர் சந்திப்பில் தெரிவித்தார்.
இதன் மூலம், 2026 ஆம் ஆண்டில் இதுவரை பதிவான மொத்த டெங்கு நோயாளர்களின் எண்ணிக்கை 55,406 ஆக உயர்ந்துள்ளது. அதேவேளை, டெங்கு தொற்றால் உயிரிழந்தவர்களின் எண்ணிக்கையும் 32 ஆக அதிகரித்துள்ளது.
கடந்த ஜூன் மாதத்தில் மட்டும் 21,565 டெங்கு நோயாளர்கள் பதிவாகியுள்ளதாக தெரிவிக்கப்பட்டுள்ளது. மொத்த நோயாளர்களில் சுமார் 52.5 சதவீதம் பேர் மேல் மாகாணத்தைச் சேர்ந்தவர்கள் என அதிகாரிகள் குறிப்பிட்டுள்ளனர்.
மேல் மாகாணத்தில் கொழும்பு மற்றும் கம்பஹா மாவட்டங்களிலேயே அதிகளவிலான பாதிப்புகள் பதிவாகியுள்ளன. கொழும்பு மாவட்டத்தில் 11,392 பேரும், கம்பஹா மாவட்டத்தில் 10,000-க்கும் அதிகமானோரும் டெங்கு தொற்றுக்கு உள்ளாகியுள்ளனர்.
வீடுகள், அரச நிறுவனங்கள் மற்றும் பாடசாலை வளாகங்களில் நுளம்புகள் பெருகும் இடங்கள் முழுமையாக அகற்றப்படாததே நோய் பரவல் அதிகரிக்க முக்கிய காரணமாக சுகாதார அதிகாரிகள் சுட்டிக்காட்டுகின்றனர்.
தற்போது டெங்கு வைரஸ் வகை 2 (DENV-2) மற்றும் வகை 3 (DENV-3) ஆகிய இரு வகைகளும் பரவி வருவதாகவும் தெரிவிக்கப்பட்டுள்ளது.
நுளம்புகள் பெருகும் இடங்களை ஒழித்தல், புகை விசிறல் உள்ளிட்ட கட்டுப்பாட்டு நடவடிக்கைகள் தொடர்ந்து முன்னெடுக்கப்பட்டு வருகின்றன. இருப்பினும், பொதுமக்களின் போதிய ஒத்துழைப்பு இல்லாத காரணத்தால் டெங்கு நோயாளர்களின் எண்ணிக்கையை எதிர்பார்த்த அளவில் குறைக்க முடியவில்லை என தேசிய டெங்கு ஒழிப்பு பிரிவு தெரிவித்துள்ளது.
