அமெரிக்க ஜனாதிபதி டொனால்ட் ட்ரம்பின் குடும்பத்தின் கிரிப்டோகரன்சி வணிகங்கள் கடந்த ஓராண்டில் 1.4 பில்லியன் அமெரிக்க டொலர்களுக்கும் அதிக வருமானத்தை ஈட்டியுள்ளதாக, அமெரிக்க அரச நெறிமுறைகள் அலுவலகத்தில் சமர்ப்பிக்கப்பட்டுள்ள 2025ஆம் ஆண்டுக்கான நிதி அறிக்கையில் தெரியவந்துள்ளது.
அந்த அறிக்கையின்படி, ட்ரம்பும் அவரது மகன்களும் இணைந்து தொடங்கிய World Liberty Financial நிறுவனத்தின் மூலம் சுமார் 800 மில்லியன் அமெரிக்க டொலர் வருமானம் கிடைத்துள்ளது. மேலும், ட்ரம்பின் பெயரில் வெளியிடப்பட்ட Meme Coin கிரிப்டோ நாணயங்களின் விற்பனை மூலம் மேலும் 635 மில்லியன் அமெரிக்க டொலர் வருமானம் ஈட்டப்பட்டுள்ளதாக குறிப்பிடப்பட்டுள்ளது.
2025ஆம் ஆண்டு ட்ரம்ப் மீண்டும் ஜனாதிபதியாக பதவியேற்றதைத் தொடர்ந்து, அமெரிக்காவில் கிரிப்டோ துறைக்கு ஆதரவான கொள்கைகள் அறிமுகப்படுத்தப்பட்டதால், அவரது மின்னிலக்க சொத்துக்களின் மதிப்பு கணிசமாக உயர்ந்துள்ளதாக சர்வதேச ஊடகங்கள் தெரிவித்துள்ளன.
கிரிப்டோ வணிகங்களைத் தவிர, அவரது பாரம்பரிய வணிகங்களான கோல்ஃப் மைதானங்கள் மற்றும் உல்லாச விடுதிகளின் வருமானமும் 15 சதவீதம் அதிகரித்து, 500 மில்லியன் அமெரிக்க டொலரைத் தாண்டியுள்ளது.
அதில், புளோரிடாவில் அமைந்துள்ள அவரது புகழ்பெற்ற Mar-a-Lago உல்லாச விடுதி மட்டும் 77 மில்லியன் அமெரிக்க டொலர் வருமானத்தைப் பதிவு செய்துள்ளதாக நிதி அறிக்கையில் குறிப்பிடப்பட்டுள்ளது.
இதற்கிடையில், ஜனாதிபதி பதவியை பயன்படுத்தி ட்ரம்போ அல்லது அவரது குடும்பத்தினரோ தனிப்பட்ட நிதி ஆதாயம் பெறும் வகையில் எந்தவொரு நலன் முரண்பாட்டிலும் ஈடுபடவில்லை என்று வெள்ளை மாளிகை விளக்கம் அளித்துள்ளதாக சர்வதேச ஊடகங்கள் செய்தி வெளியிட்டுள்ளன.
