செல்வம் பெருகும் நாளாக கருதப்படும் அட்சய திருதியை இன்று (ஏப்ரல் 19) பக்தி உற்சாகத்துடன் கொண்டாடப்படுகிறது. “அட்சயம்” என்றால் குறையாதது என்று பொருள்; இந்த நாளில் தொடங்கும் நற்செயல்கள் மற்றும் வாங்கப்படும் பொருட்கள் தொடர்ந்து வளர்ச்சி பெறும் என்பது நம்பிக்கை.
இந்த ஆண்டிற்கான முக்கிய நேர விவரங்கள்:
- திருதியை திதி தொடக்கம்: ஏப்ரல் 19 காலை 10:49 மணி
- திருதியை திதி முடிவு: ஏப்ரல் 20 காலை 07:27 மணி
- தங்கம் வாங்க உகந்த நேரம்: ஏப்ரல் 19 காலை 10:49 மணி முதல் ஏப்ரல் 20 அதிகாலை 05:51 மணி வரை
இந்த ஆண்டு சூரியன் மேஷ ராசியிலும், சந்திரன் ரிஷப ராசியிலும் உச்ச நிலையில் இருப்பதால் ‘அட்சய யோகம்’ உருவாகியுள்ளது. இதனால் இந்த நேரத்தில் தொடங்கும் முதலீடுகள், புதிய வணிகங்கள் ஆகியவை சிறப்பான பலனைத் தரும் என ஜோதிடர்கள் தெரிவிக்கின்றனர்.
தங்கம் வாங்க முடியாதவர்கள், கல் உப்பு, பச்சரிசி, தானியங்கள், வெள்ளி பொருட்கள், புத்தாடைகள் போன்ற மங்களகரமான பொருட்களை வாங்கலாம் என பரிந்துரைக்கப்படுகிறது.
அட்சய திருதியை நாளின் பின்னணியில் பல புராணச் சம்பவங்களும் உள்ளன. பரசுராமர் அவதரித்த தினமாகவும், அன்னபூரணி தேவி உலகுக்கு அருள் புரிந்த நாளாகவும், பகீரதனின் தவத்தால் கங்கை பூமிக்கு வந்த புனித நாளாகவும் இந்நாள் கருதப்படுகிறது.
மேலும், இந்த நாளில் ஏழைகளுக்கு உணவு, ஆடை, குடை போன்றவற்றை தானமாக வழங்குவது மிகுந்த புண்ணியத்தை தரும் என அறிஞர்கள் கூறுகின்றனர்.
