இந்திய கிரிக்கெட் அணியின் முன்னணி சகலதுறை ஆட்டக்காரரான ஹர்திக் பாண்டியா மீண்டும் காயமடைந்துள்ள நிலையில், அவுஸ்திரேலியா ‘ஏ’ அணிக்கு எதிரான ஒருநாள் தொடரிலிருந்து விலகியுள்ளார்.
புதுச்சேரியில் நடைபெறவுள்ள இந்தத் தொடருக்காக உடற்தகுதி அடிப்படையில் ஹர்திக் பாண்டியா தேர்வு செய்யப்பட்டிருந்தார். தொடர் எதிர்வரும் ஒக்டோபர் 6ஆம் திகதி ஆரம்பிக்கவுள்ள நிலையில், அவரது கால் முன்பகுதியில் ஏற்பட்டுள்ள புதிய காயம் காரணமாக அவர் தொடரில் இருந்து விலகியுள்ளார்.
இதனிடையே, ஒக்டோபர் 22ஆம் திகதி ஆரம்பமாகவுள்ள நியூசிலாந்துக்கு எதிரான ஐந்து போட்டிகள் கொண்ட இருபதுக்கு 20 தொடரிலும் ஹர்திக் பாண்டியா பங்கேற்பது தற்போது சந்தேகமாகியுள்ளது.
கடந்த சில மாதங்களாக காயங்களால் அவதிப்பட்டு வரும் ஹர்திக், ஜூன் மாதம் ஆப்கானிஸ்தானுக்கு எதிரான தொடரிலும் காயம் காரணமாக பங்கேற்கவில்லை.
அவுஸ்திரேலியா ‘ஏ’ தொடரின் முதல் போட்டிக்கு இன்னும் இரண்டு வாரங்களே உள்ள நிலையில் புதிய காயம் ஏற்பட்டிருப்பது இந்திய அணியின் நிர்வாகத்திற்கு கவலையை ஏற்படுத்தியுள்ளது. அவரது உடற்தகுதி நிலை தொடர்ந்து கண்காணிக்கப்படும் என எதிர்பார்க்கப்படுகிறது.
