மத்திய கிழக்கில் நீடித்து வரும் பதற்றம் மற்றும் உலகளாவிய விநியோகச் சிக்கல்களால் சர்வதேச எண்ணெய் சந்தை தொடர்ந்து நிலையற்ற நிலையில் உள்ளது. இந்தச் சூழ்நிலையின் தாக்கத்தை எதிர்கொள்வதற்கான நடவடிக்கைகள் குறித்து கலந்துரையாட, ஜனாதிபதி அனுர குமார திசாநாயக்கவுடன் அவசர சந்திப்பை இலங்கை பெட்ரோலிய கூட்டுத்தாபனம் (CPC) கோரியுள்ளது.
உலக எண்ணெய் சந்தையின் தற்போதைய நிலைமை இலங்கைக்கு கவலைக்குரியதாக இருப்பதாக CPC தலைவர் டி.ஜே. ராஜகருண தெரிவித்துள்ளார். மோசமடைந்து வரும் நிலைமையைப் பொதுமக்களும் புரிந்துகொள்ள வேண்டியது அவசியம் எனவும் அவர் வலியுறுத்தியுள்ளார்.
இந்த மாதத் தொடக்கத்துடன் ஒப்பிடுகையில், சர்வதேச சந்தையில் டீசல் விலை சுமார் 45 சதவீதமும், பெட்ரோல் விலை 30 சதவீதமும் உயர்ந்துள்ளதாக அவர் குறிப்பிட்டார். அதேபோல், மசகு எண்ணெய் விலையும் குறிப்பிடத்தக்க அளவில் அதிகரித்திருப்பதால், எரிபொருள் இறக்குமதியை முழுமையாகச் சார்ந்திருக்கும் இலங்கை கூடுதல் பொருளாதார அழுத்தத்தை எதிர்கொண்டு வருவதாகவும் தெரிவித்தார்.
எதிர்காலத்தில் மேற்கொள்ள வேண்டிய நடவடிக்கைகள் குறித்து ஜனாதிபதியுடன் விரிவாக ஆலோசிக்க சந்திப்பைக் கோரியுள்ளதாகக் கூறிய ராஜகருண, நாட்டில் எரிபொருள் நுகர்வைக் கட்டுப்படுத்தும் நடவடிக்கைகளும் அவசியமானவை என்றார்.
தற்போதைய உலக சந்தை விலைகளைப் பொருத்தவரை, உள்நாட்டில் நிலவும் தற்போதைய விலையில் எரிபொருளை விற்பனை செய்வது சவாலாக இருப்பதாக, நாட்டில் இயங்கும் பிற சில்லறை எரிபொருள் விநியோக நிறுவனங்களும் சுட்டிக்காட்டியுள்ளதாக அவர் தெரிவித்தார்.
இதற்கிடையில், ஈரான் தொடர்பான பதற்றம் மற்றும் யுக்ரைன் போரால் ஏற்பட்ட விநியோகத் தடைகள் காரணமாக, மத்திய கிழக்கு, ஐரோப்பா மற்றும் ஆபிரிக்கா பகுதிகளில் மசகு எண்ணெய் விலைகள் கடந்த இரண்டு மாதங்களில் இல்லாத அளவுக்கு இந்த வாரம் உயர்ந்துள்ளதாக ரொய்டர்ஸ் செய்தி தெரிவித்துள்ளது. சில சந்தைகளில் ஒரு பீப்பாய் மசகு எண்ணெயின் விலை 110 அமெரிக்க டொலரை நெருங்கியுள்ளதாகவும் அதில் குறிப்பிடப்பட்டுள்ளது.
மேலும், ‘எல் நினோ’ வானிலை தாக்கத்தால் ஏற்பட்ட வறட்சியால் நீர்மின் உற்பத்தி குறைந்திருப்பதால், மின்சார உற்பத்திக்காக அதிகளவு எரிபொருளைப் பயன்படுத்த வேண்டிய நிலை ஏற்பட்டுள்ளதாகவும் ராஜகருண தெரிவித்தார்.
“போதுமான நீர்மின் உற்பத்தி இல்லாததால், மின் உற்பத்திக்காக எங்களது இருப்பிலிருந்து அதிகளவு எரிபொருளை பயன்படுத்த வேண்டிய கட்டாயம் ஏற்பட்டுள்ளது. இது CPC எதிர்கொள்ளும் மேலும் ஒரு முக்கிய சவாலாகும்,” என அவர் குறிப்பிட்டார்.
