நடப்பாண்டில் மாகாண சபைத் தேர்தலை நடத்த அரசாங்கத்திற்கு திட்டமில்லை என மக்கள் விடுதலை முன்னணியின் பொதுச்செயலாளர் Tilvin Silva தெரிவித்துள்ளார்.
யாழ்ப்பாணத்தில் நடைபெற்ற நிகழ்வொன்றின் பின்னர் ஊடகங்களுக்கு கருத்து தெரிவிக்கையிலேயே அவர் இந்த தகவலை வெளியிட்டார்.
மாகாண சபைத் தேர்தலுக்காக ஒதுக்கப்பட்டிருந்த நிதி, நாட்டில் ஏற்பட்ட கடும் வெள்ளப் பெருக்கு மற்றும் பொருளாதார, அரசியல் நெருக்கடிகளை சமாளிக்க அனர்த்த நிவாரண பணிகளுக்காக பயன்படுத்தப்பட்டதாக அவர் குறிப்பிட்டுள்ளார்.
இதற்காக சுமார் 500 பில்லியன் ரூபாய் ஒதுக்க வேண்டிய நிலை ஏற்பட்டதால், இந்த ஆண்டில் தேர்தலை நடத்த முடியாமல் போனதாகவும் அவர் விளக்கமளித்தார்.
மேலும், முன்னாள் ஜனாதிபதி Ranil Wickremesinghe தலைமையிலான ஆட்சிக் காலத்தில் தேர்தல் சட்டங்களில் ஏற்பட்ட சிக்கல்கள் காரணமாக தற்போதைய சட்டநிலையை ஆய்வு செய்ய நாடாளுமன்றக் குழு ஒன்று நியமிக்கப்பட்டுள்ளதாகவும் தெரிவித்தார்.
அந்தக் குழுவின் அறிக்கை கிடைத்தவுடன், அடுத்த ஆண்டில் மாகாண சபைத் தேர்தலை நடத்த முடியும் என்ற நம்பிக்கையையும் டில்வின் சில்வா வெளியிட்டுள்ளார்.
