டிட்வா சூறாவளியால் ஏற்பட்ட திடீர் அனர்த்தத்தால் பாதிக்கப்பட்ட மக்களின் வாழ்வாதாரத்தை மீண்டும் இயல்பு நிலைக்குக் கொண்டு வருவதற்காக நடைமுறைப்படுத்தப்பட்டுள்ள விசேட வலுவூட்டல் திட்டத்தை மேலும் பலப்படுத்தும் வகையில் ஜனாதிபதி சமர்ப்பித்த முக்கிய முன்மொழிவுகளுக்கு அமைச்சரவை அங்கீகாரம் வழங்கியுள்ளது.
2025 டிசம்பர் 05 ஆம் திகதி நடைபெற்ற அமைச்சரவைக் கூட்டத்தில், சூறாவளியால் பாதிக்கப்பட்ட மக்களுக்கான விசேட வலுவூட்டல் திட்டம் அங்கீகரிக்கப்பட்டிருந்தது. அதன் பின்னர், கடுமையாக பாதிக்கப்பட்ட மாவட்டங்களில் முன்னெடுக்கப்பட்ட நடவடிக்கைகளின் முன்னேற்றம் ஆய்வு செய்யப்பட்டபோது பல சவால்கள் அடையாளம் காணப்பட்டன.
அவற்றை தீர்க்கும் நோக்கில், நிதி, திட்டமிடல் மற்றும் பொருளாதார அபிவிருத்தி அமைச்சர் என்ற வகையில் ஜனாதிபதி முன்வைத்த பரிந்துரைகளுக்கு அமைச்சரவை தற்போது ஒப்புதல் வழங்கியுள்ளது.
இதன்படி, வீடுகளை இழந்த குடும்பங்களுக்கு புதிய வீடுகள் நிர்மாணிக்கப்படும் வரை வழங்கப்பட்டு வந்த மாதாந்திர வீட்டு வாடகை உதவித்தொகை காலம் 6 மாதங்களிலிருந்து 9 மாதங்கள் வரை நீட்டிக்கப்படவுள்ளது. இதற்குத் தேவையான சுற்றறிக்கைகள் மற்றும் வழிகாட்டுதல்களை வெளியிட நடவடிக்கை எடுக்கப்பட உள்ளது.
மேலும், பாறைக் கற்கள், மண் மற்றும் இடிபாடுகள் குவிந்ததால் சேதமடைந்துள்ள விவசாய நிலங்களை மீண்டும் பயிரிடத்தக்க நிலையில் மாற்றுவதற்கான திட்டங்களும் செயல்படுத்தப்படவுள்ளன. மாவட்ட விவசாய அபிவிருத்தி அதிகாரிகளின் மதிப்பீடுகளின் அடிப்படையில், தேவையான அனுமதிகளைப் பெற்று இடிபாடுகள் அகற்றப்பட்டு வயல்கள் சீரமைக்கப்படும்.
அத்துடன், கற்கள் மற்றும் மண்குவியல்கள் சரிந்துள்ள பகுதிகளிலும், மண்சரிவு அபாயம் நிலவும் இடங்களிலும் அபாயத்தைக் குறைக்கும் நடவடிக்கைகள் மேற்கொள்ளப்படவுள்ளன. இந்நடவடிக்கைகள் தேசிய கட்டிட ஆராய்ச்சி நிறுவனத்தின் பரிந்துரைகளுக்கு அமைய முன்னெடுக்கப்படும்.
இந்தப் பணிகளுக்குத் தேவையான நிதி, பாதுகாப்பு அமைச்சின் கீழ் செயல்படும் மண்சரிவு தணிப்புத் திட்டத்தின் ஒதுக்கீடுகளில் இருந்து முன்னுரிமை அடிப்படையில் பயன்படுத்தப்படவுள்ளது. மேலும், உள்கட்டமைப்பு மற்றும் மறுசீரமைப்பு பணிகள் தடையின்றி முன்னெடுக்கப்படுவதற்காக, அனர்த்த நிவாரணம் மற்றும் புனரமைப்புக்கான நிதிகளை திறைசேரி மூலம் தொடர்ச்சியாக வழங்க அமைச்சரவை தீர்மானித்துள்ளது.
