கனடா மற்றும் லக்சம்பர்க் நாடுகளில் வேலைவாய்ப்பு பெற்றுத் தருவதாகக் கூறி, ஐந்து பேரிடம் இருந்து சுமார் 8 மில்லியன் ரூபாய் மோசடியாகப் பெற்றதாகக் கூறப்படும் சந்தேகநபர் ஒருவரை வெளிநாட்டு வேலைவாய்ப்புப் பணியகத்தின் புலனாய்வு அதிகாரிகள் கைது செய்துள்ளனர்.
நேற்றுமுன்தினம் (14) வெல்லம்பிட்டிய பகுதியில் கைது செய்யப்பட்ட சந்தேகநபர், கொலன்னாவையைச் சேர்ந்த 38 வயதுடைய ஃபைஸ் முகமது நஃப்திகர் என அடையாளம் காணப்பட்டுள்ளார்.
புலனாய்வுகளின்படி, யாழ்ப்பாணம் மல்லாகம் பகுதியைச் சேர்ந்த ஐந்து பேருக்கு கனடா மற்றும் லக்சம்பர்க் நாடுகளில் வேலைவாய்ப்பு ஏற்பாடு செய்து தருவதாக உறுதியளித்து, அவர்களிடமிருந்து சுமார் 8 மில்லியன் ரூபாயை மோசடியாகப் பெற்றுள்ளதாக தெரியவந்துள்ளது.
கைது செய்யப்பட்ட சந்தேகநபர் நேற்று (15) மாளிகாகந்த நீதவான் நீதிமன்றத்தில் முன்னிலைப்படுத்தப்பட்டார். இதையடுத்து, தலா 5 மில்லியன் ரூபாய் மதிப்புள்ள இரண்டு பிணைப்பத்திரங்களில் அவரை விடுவிக்க நீதிமன்றம் அனுமதி வழங்கியது. மேலும், முறைப்பாட்டாளர்களுக்கு 100,000 ரூபாய் வழங்குமாறும் நீதிமன்றம் உத்தரவிட்டுள்ளது.
இதனிடையே, சந்தேகநபருக்கு எதிராக மல்லாகம் காவல்நிலையத்திலும் பல முறைப்பாடுகள் கிடைத்துள்ளதாக வெளிநாட்டு வேலைவாய்ப்புப் பணியகத்தின் புலனாய்வுப் பிரிவு தெரிவித்துள்ளது.
