வெனிசுலாவின் கடற்கரைப் பகுதியில் 7.1 ரிக்டர் அளவிலான சக்திவாய்ந்த நிலநடுக்கம் பதிவாகியுள்ளதாக அமெரிக்க புவியியல் ஆய்வு மையம் (USGS) தெரிவித்துள்ளது.
இந்த நிலநடுக்கத்தின் அதிர்வுகள் தலைநகர் கராகஸ் உள்ளிட்ட பல பகுதிகளில் தீவிரமாக உணரப்பட்டதாக தகவல்கள் தெரிவிக்கின்றன. திடீர் அதிர்வால் உயர்மாடிக் கட்டடங்கள் மற்றும் குடியிருப்புகள் பலத்த குலுக்கலுக்குள்ளானதால், அச்சமடைந்த மக்கள் வீதிகளுக்கு விரைந்தனர்.
ரொய்ட்டர்ஸ் செய்திச் சேவையின் தகவலின்படி, கராகஸ் நகரிலுள்ள சில கட்டடங்களின் வெளிப்புறச் சுவர்களில் குறிப்பிடத்தக்க விரிசல்கள் ஏற்பட்டுள்ளன.
மேலும், இந்த நிலநடுக்கத்தைத் தொடர்ந்து புவேர்ட்டோ ரிகோ மற்றும் வெர்ஜின் தீவுகள் பகுதிகளுக்கு அமெரிக்க ஆழிப்பேரலை எச்சரிக்கை மையம் ஆரம்பகட்ட சுனாமி அச்சுறுத்தல் எச்சரிக்கையை வெளியிட்டுள்ளது.
நிலநடுக்கத்தால் ஏற்பட்ட சேதங்கள் மற்றும் பாதிப்புகள் தொடர்பான மேலதிக தகவல்களை அதிகாரிகள் தொடர்ந்து மதிப்பீடு செய்து வருகின்றனர்.
