சர்வதேச கிரிக்கெட் சம்மேளனத்தின் உலக டெஸ்ட் சாம்பியன்ஷிப் (2025–2027) தொடரின் ஒரு பகுதியாக, இந்திய ஆண்கள் தேசிய கிரிக்கெட் அணி எதிர்வரும் ஆகஸ்ட் மாதம் இலங்கைக்கு உத்தியோகபூர்வ சுற்றுப்பயணத்தை மேற்கொள்ளவுள்ளது.
இந்த சுற்றுப்பயணத்தின் போது, இலங்கை அணியுடன் இரண்டு போட்டிகள் கொண்ட டெஸ்ட் தொடரில் இந்திய அணி பங்கேற்கிறது. இந்த தொடருக்கான உத்தியோகபூர்வ போட்டி அட்டவணையை ஸ்ரீலங்கா கிரிக்கெட் வெளியிட்டுள்ளது.
அதன்படி, முதல் டெஸ்ட் போட்டி ஆகஸ்ட் 15 முதல் 19 வரை காலி சர்வதேச கிரிக்கெட் மைதானத்தில் நடைபெறவுள்ளது.
இரண்டாவது டெஸ்ட் போட்டி ஆகஸ்ட் 23 முதல் 27 வரை கொழும்பிலுள்ள சிங்களீஸ் விளையாட்டுக்கழக (SSC) மைதானத்தில் நடைபெறவுள்ளது.
இரு போட்டிகளும் இலங்கை நேரப்படி தினமும் காலை 10.00 மணிக்கு தொடங்கும் என ஸ்ரீலங்கா கிரிக்கெட் அறிவித்துள்ளது.
உலக டெஸ்ட் சாம்பியன்ஷிப் (WTC) புள்ளிப்பட்டியலில் முக்கிய இடத்தைப் பெறும் நோக்கில், இலங்கை மற்றும் இந்தியா ஆகிய இரு அணிகளுக்கும் இந்தத் தொடர் மிகவும் முக்கியமானதாகக் கருதப்படுகிறது.
